Дин 20 декабрь 2016 12:35

Татарстан мөфтие Россиянең Төркиядәге илчесе үтерелү уңаеннан кайгы уртаклашуын белдерде

Мәрхүмнең якыннарына кайгылы сынауны, зур хәсрәтне күтәрергә Аллаһы Тәгалә үзе ярдәм итсә иде, диелә кайгынамәдә.

Скопировать ссылку

(Казан, 20 декабрь, "Татар-информ"). Татарстан мөфтие Камил Сәмигуллин Россиянең Төркиядәге илчесе үтерелү уңаеннан кайгы уртаклашуын белдерде. Рәсми кайгынамә Татарстан мөселманнарының Диния нәзарәте сайтында урнаштырылган.

"Төркия башкаласы Анкарада Россия илчесе Андрей Карлов үтерелде. Татарстан мөселманнары һәм шәхсән үз исемемнән мәрхүм Андрей Карловның туганнарының һәм якыннарының тирән кайгысын уртаклашам. Мәрхүмнең якыннарына кайгылы сынауны, зур хәсрәтне күтәрергә Аллаһы Тәгалә үзе ярдәм итсә иде! Барыбыз да Аллаһтан килдек һәм Аллаһка кайтачакбыз", - диелә кайгынамәдә.

Мөрәҗәгатьтә шулай ук: "Коръәндә әйтелгәнчә, "Иртәгә ни кылачагын һич кем белми. Кеше үзенең кайда үләчәген белми. Шик юктыр ки, Аллаһ бөтенесен белеп тора. Ул барысыннан да хәбардар (Локман сүрәсе, 34 нче аять)", - дигән сүзләр дә бар.

#Андрей Карлов

Сәхифәләр

Татарстан мөфтие Россиянең Төркиядәге илчесе үтерелү уңаеннан кайгы уртаклашуын белдерде