Татарстан кызлары һәм Роза Гадиева Miss Environment International бәйгесенә юл тотты
«Мисс Европа 2024» титулы иясе һәм дөньякүләм матурлык конкурслары судьясы Роза Гадиева һәм Россия һәм Татарстан вәкилләре Филиппинга юл тотты. Биредә әйләнә-тирә дөньяны саклау буенча сәяси әһәмиятле Мiss Environment International 2025 бәйгесе уза.
Чара дәүләт, муниципаль һәм халыкара экологик институтлары альянсы, Филиппин Климат үзгәрешләре комиссиясе, Манила мэриясе, шулай ук Берләшкән милләтләр оешмасының әйләнә-тирә мохит буенча халыкара вәкилләре һәм Яшел үсеш глобаль институты ярдәмендә үткәрелә.
Казан кызы Роза Гадиева, «Мисс Европа 2024» титулы иясе бәйгегә дәрәҗәле кунак һәм жюри әгъзасы буларак чакырылган. Бу Татарстанның матурлык һәм экология халыкара аренасында йогынтысы артуны ассызыклый.
Аның белән бергә Казаннан эшчәнлекләре табигатьне саклау белән бәйле булган ике катнашучы китте.
Анастасия Графиня Кызыл китапка кертелгән боланнарның популяциясен торгызу программасын гамәлгә ашыра. Хәзерге вакытта боланнарның баш саны 300дән артык, табигатькә шуларның 80нән артыгы чыгарылган. Анастасия шулай ук мәгърифәтчелек эше белән дә шөгыльләнә, экологик лекцияләр үткәрә һәм кешеләрне экология һәм әйләнә-тирә мохит проблемаларын хәл итүгә җәлеп итә. Конкурста ул Татарстанны тәкъдим итәчәк.
Карина Искәндәрова – экологик активист. Ул магистратурада (табигатьне саклау кафедрасында) укый. Командасы белән бергә 3 меңнән артык агач утырткан һәм даими рәвештә күлләрне һәм әйләнә-тирә мохитне чистарту экспедицияләрендә катнаша. Ул конкурста Россияне тәкъдим итәчәк.
Институтларның зур ярдәме, глобаль экологик көн тәртибе һәм жюрида күренекле сәяси һәм иҗтимагый эшлеклеләр катнашу нәтиҗәсендә Филиппинда узучы бәйге әһәмиятле вакыйга булачак. Чарага Манила мэры Франциско Иско Морено ярдәм күрсәтә.
«Мiss Environment 2025 гала-кичәсендә Манила мэры Франциско Иско Морено шәхсән сәламләгән кешеләр арасында булу – минем өчен зур дәрәҗә», – дип билгеләп үткән Гадиева социаль челтәрләрендә.
Роза Гадиева – гасырлык тарихы булган «Мисс Европа» конкурсы реестрына җиңүче буларак кергән беренче татар кызы.