Татарстан китап нәшриятының яңа җитәкчесе Рөстәм Галиуллин: Мин үз мохитемдә калдым
Татарстан китап нәшриятының генераль директоры итеп язучы Рөстәм Галиуллин билгеләнде. Бүген аны «Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев коллективка тәкъдим итте.
Фото: © Татарстан китап нәшриятының матбугат үзәге
«Татарстан китап нәшрияты миңа автор буларак та, укучы буларак бик якын – беренче китабым да, барлык татарча китапларым да биредә чыкты. Шуңа үз дөньямда, үз мохитемдә калдым дия алам», – диде Рөстәм Галиуллин «Татар-информ» хәбәрчесенә.
«106 еллык тарихы булган Татарстан китап нәшриятын җитәкләргә алынуның җаваплылыгын аңлыйм – шуңа аның үз йөзен саклап, традицияләрне дәвам итеп һәм заманча трендларны кулланып эшләргә язсын», – диде ул.
- Август урталарында Татарстан китап нәшрияты директоры Илдар Сәгъдәтшинның әлеге вазифасыннан китүе турында билгеле булган иде.
- Язучы Рөстәм Галиуллин тумышы белән Арча районының Наласа авылыннан. 2018 елдан бирле «Казан утлары» журналын җитәкләде.