Татарстан җитәкчелеге Василий Лихачев вафат булу сәбәпле кайгы уртаклашты
Кайгынамәдә Татарстан Дәүләт Советының элеккеге рәисенең талантын, җаваплылык хисен һәм югары принципиальлеген билгеләделәр.
(Казан, 8 апрель, «Татар-информ»). Татарстан җитәкчелеге республика Дәүләт Советының элеккеге рәисе, Татарстанның элеккеге вице-президенты Василий Лихачевның вафатына бәйле кайгы уртаклашты. Бу хакта Татарстан Президенты матбугат хезмәте хәбәр итә.
- Василий Лихачев бүген 68нче яшендә вафат булды. Ул Казанның Арча зиратында җирләнәчәк.
«Республика җәмәгатьчелеге авыр югалту кичерде», - диелә кайгынамәдә. Анда Лихачевның таланты, югары принципиальлеге һәм җаваплылык хисе билгеләп үтелә.
«Эшлеклелек һәм кешелеклелек сыйфатлары, кешеләргә карата ихтирамлы һәм ипле мөнәсәбәте белән Василий Николаевич безнең республикада да, аннан читтә дә лаеклы абруй казанды», - диелгән әлеге текстта.
Документка Татарстан Республикасы Президенты Рөстәм Миңнеханов, Татарстан Республикасы Дәүләт Киңәшчесе Минтимер Шәймиев, Татарстан Республикасы Дәүләт Советы Рәисе Фәрит Мөхәммәтшин, Татарстан Республикасы Премьер-министры Алексей Песошин һәм башкалар имза куйган.