Татарстан игенчеләре шикәр чөгендере уңышын җыялар
Бүгенге көнгә Татарстанда 15,2 мең тонна шикәр чөгендере җыелган.
(Казан, 27 август, "Татар-информ"). Шушы көннәрдә республика игенчеләре шикәр чөгендере уңышын җыя башладылар. Оператив белешмәләргә караганда 27 августка Татарстан Республикасы буенча 427 га мәйданда шикәр чөгендере җыелган. Бу турыда Татарстан Республикасы Авыл хуҗалыгы һәм азык-төлек министрлыгы матбугат хезмәте хәбәр итә.
Барысы әлеге культураны 64,3 мең га мәйданда җыярга кирәк булачак.
Бүгенге көнгә Татарстанда 15,2 мең тонна шикәр чөгендере җыелган, бер гектардан 356 центнер уңыш чыга. Әлеге вакытта бу культура республиканың өч районында җыела.
Сарман муниципаль районында беренчеләрдән булып «Нөркәй» агрофирмасы” ҖЧҖ механизаторлары бу эшкә керештеләр. Биредә шикәр чөгендере 3003 гектар мәйданны били. Ә район буенча 9269 гектар мәйданда чөгендер чәчелгән. Бүгенгә 140 га мәйданда 5740 тонна татлы тамыр чыгарылган, уңыш - 410 ц/га.
Тукай районында шикәр чөгендере 87 га мәйданда 3,1 мең тонна шикәр чөгендере җыелган, уртача уңыш - бер гектардан 350 центнер.
Зәй районы игенчеләре 200 гектар мәйданда 6400 тонна шикәр чөгендере җыйганнар. Уртача уңыш - бер гектардан 320 центнер.