Татарстан Идел буе округының туристлар өчен иң җәлеп итүчән төбәкләре рейтингында беренче
Татарстан икенче ел рәттән Идел буе федераль округының туристлар өчен иң җәлеп итүчән төбәкләре рейтингында беренче булды. Моннан тыш, республика гомумроссия индексы лидерлары бишлегенә керде – дүртенче урын яулады. Бу хакта ТР Туризм буенча дәүләт комитеты матбугат хезмәте хәбәр итә.
Республика илнең туристлар өчен иң кызыклы юнәлешләренең берсе булып кала. Бу нәтиҗәгә Казан да зур өлеш кертә – ул тотрыклы рәвештә эчке туризм өчен иң популяр шәһәрләр арасына керә. Сәяхәтчеләрнең кызыксынуын бай мәдәни-тарихи мирас, алга киткән туристлык инфраструктурасы, сервисларның киң спектры һәм уңайлы транспорт логистикасы тәэмин итә.
Шулай ук Идел буеның башка шәһәрләре – Уфа, Самара, Түбән Новгород һәм Ульяновск та туристлык потенциалының югары күрсәткечләрен күрсәткән.
Төбәкләрнең туристлар өчен җәлеп итүчәнлеге гомумроссия индексында Татарстан Мәскәү, Санкт-Петербург һәм Краснодар краеннан гына калышкан һәм дүртенче урында урнашкан.
Рейтинг туриндустрия үсеше, инфраструктура, туристлык өлкәсенең иминлеге һәм тотрыклылыгы һәм башкалар кебек 50 күрсәткечтән торган комплекслы система буенча төзелә.
Эчке туризмны үстерү «Туризм һәм кунакчыллык» илкүләм проекты максатларына туры килә.