Татарстан халыклары мәдәнияте Россиянең аудиовизуаль энциклопедиясенә керәчәк
Россия Президенты гранты хисабына, “Содружество” оешмасы Идел буе федераль округында яшәүче халыкларга багышланган 14 видеофильм төшерә башлады.
(Казан, 9 август, “Татар-информ”). Россиянең “Тамырларга кайту” (“Возвращение к истокам”) аудиовизуаль энциклопедиясен төзүче команда август аенда Татарстан халыклары мәдәнияте һәм традицияләре турында фильм төшерәчәк. Бу хакта Татарстанның Халыклар дуслыгы йорты хәбәр итә.
Әлеге проект Россия Президенты гранты хисабына, “Содружество” социаль һәм мәдәниятара хезмәттәшлек үзәге” коммерцияле булмаган оешмасы тарафыннан гамәлгә ашырыла. Проект кысаларында Идел буе федераль округында яшәүче халыкларга багышланган 14 видеофильм төшерү планлаштырыла. Аларны декабрь аенда тәкъдим итәчәкләр.
Татарстанда татар, рус, керәшен, удмурт, чуваш иҗат коллективларын, шулай ук халык һөнәрчеләрен төшерәчәкләр. Проектның иҗат төркеме Казан, Кукмара, Мамадыш, Зәй һәм Чирмешән районнарын йөреп чыгачак, очрашулар Халыклар дуслыгы йортларында, Мәдәният йортларында, паркларда оештырылачак.
Аудиовизуаль энциклопедия төзү максатында Татарстаннан тыш, Башкортстан, Марий Эл, Мордовия, Удмуртия, Чувашия республикаларына, Киров, Нүбән Новгород, Оренбург, Пенза, Пермь, Самара, Саратов, Ульяновск өлкәләренә 7 экспедиция көтелә.