Татарстан Электрон мактау тактасы булдыру тәҗрибәсе белән уртаклашырга әзер
Татарстанның Электрон мактау тактасы Россиянең башка төбәкләрендә дә кызыксыну уята. ТР дәүләт идарәсен цифрлы нигездә үстерү, мәгълүмати технологияләр һәм элемтә министры урынбасары Булат Габдрахманов «Татар-информ» агентлыгында узган матбугат конференциясендә шулай дип белдерде.
«Мондый проект Россиянең бер генә төбәгендә дә юк. Әлегә конкрет тәкъдимнәр килмәде, әмма проект белән кызыксынучылар бар. Платформада инде 2 миллион якын карау теркәлгән, аның күп өлеше - башка төбәкләрдән. Бренд көннән-көн ныграк таныла», - дип уртаклашты спикер.
Габдрахманов, әгәр башка төбәкләр тәҗрибә уртаклашырга теләсәләр, Татарстан программа карарлары белән уртаклашырга әзер, дип ышандырды. «Монда проблемалар күрмим», - дип искәртте министр урынбасары.
Узган атнада, 6 августта, Татарстанда Электрон мактау тактасы эшли башлады. Сәнәгать предприятиеләренең иң яхшы хезмәткәрләре, түрәләр һәм бюджет өлкәсе хезмәткәрләренең фотосурәтләре һәм алар турында кыскача мәгълүмат ресурста бер елга урнаштырыла.
Электрон мактау тактасын быелның 1 маендагы указы белән Татарстан Республикасы Рәисе Рөстәм Миңнеханов гамәлгә куйды. Инициатива республика халкының һөнәри казанышларын, аларның намуслы хезмәтләрен һәм төбәкнең социаль-икътисади үсешенә керткән өлешләрен билгеләп үтүне максат итеп куя.
Платформада Татарстанның 4,8 мең предприятиесен тәкъдим итүче 15 меңнән артык хезмәткәр турында мәгълүмат урнаштырылган.