Татарстан ДОСААФы Россия Кораллы көчләре өчен белгечләр әзерли
ДОСААФ армия, авиация һәм флотка ярдәм итү буенча ирекле җәмгыяте гражданнарны хәрби белгечлек буенча әзерли, яшьләргә хәрби-патриотик тәрбия бирә.
(Казан, 19 февраль, “Татар-информ”, Динә Йосыпова). Татарстанның ДОСААФ армия, авиация һәм флотка ярдәм итү буенча ирекле җәмгыяте быел Россиянең Кораллы көчләре өчен 857 белгеч әзерләячәк. Бүген бу хакта Казан югары танк-команда училищесында үткән брифингта Татарстанның ДОСААФ идарәсе рәисе, генерал-майор Дамир Динниулов хәбәр итте.
“ДОСААФ Россия Федерациясенең Кораллы көчләре өчен белгечләр әзерли. 2018 елда биш хәрби-исәпкә алу белгечлекләре буенча 873 курсант әзерләнде. Алар С һәм Д категорияле һәм тиз йөрешле траншея машиналары (БТМ) йөртүчеләре, МТ-ЛВ чылбырлы тягач йөртүчеләре һәм атучы-парашютчылар. 2019 елда 857 белгеч әзерләргә кирәк”, - диде Дамир Динниулов.
Республиканың ДОСААФ армия, авиация һәм флотка ярдәм итү буенча ирекле җәмгыяте гражданнарны хәрби белгечлек буенча әзерли, яшьләргә хәрби-патриотик тәрбия бирә, авиация, техник һәм хәрби-гамәли спорт төрләрен үстерә, диде Татарстанның ДОСААФ идарәсе рәисе.