news_header_top_970_100
16+
news_header_bot_970_100

Татарстан әдипләре язучыларның 75 нче Бөтендөнья конгрессында катнашты

Татарстан делегациясе конгрессның рус телендә сөйләшүче әдипләр секциясен оештыру инициативасы белән чыккан иде. Быел анда рус, татар, казах, кыргыз, украин, чех һәм словак үзәкләре керде

(Казан, 30 октябрь, “Татар-информ”). Алдан хәбәр ителгәнчә, 20 октябрьдә Австриянең Линц шәһәрендә язучыларның халыкара ПЕН-клубы юнәлеше буенча 75 нче Бөтендөнья конгрессы ачылды. Анда 147 ил делегациясе катнаша. Татарстаннан форумда язучылар Туфан Миңнуллин, Разил Вәлиев һәм Әхәт Мушинский, Мәскәүдән Татар пен-клубы вәкиле Борис Пантелеев катнашты.

Рус ПЕН-үзәге форумга Андрей Битов һәм Екатерина Турчанинованы делегат итеп җибәрде. Язучыларның дөньякүләм конгрессында Халыкара ПЕН-клубының яңа президенты итеп Канада язучысы Джон Релстон Сэйул сайланды. Халыкара ПЕН-клубка Албан һәм Монгол ПЕН-үзәкләре кабул ителде.

Конгресста әдәбиятчыларның дөньякүләм җәмәгатьчелегенә Татар ПЕН-үзәгенең яңа президенты – Татарстан Республикасының Г.Тукай исемендәге Дәүләт премиясе лауреаты, язучы, ТР Дәүләт Советы депутаты Разил Вәлиев тәкъдим ителде. Конгресс китапханәсенә татар әдипләренең инглиз телендә дөнья күргән китаплары бүләк ителде.

Татар ПЕН-үзәге делегациясе алтай телләре гаиләсенә кергән язучыларны берләштергән даими эшләүче “Урал-Алтай” секциясе эшендә катнашты. “Урал-Алтай” берләшмәсенең беренче конгрессы быел августта Истанбулда узган иде, киләсе елда алар Бишкәк шәһәрендә җыелачак.

Татарстан делегациясе конгрессның рус телендә сөйләшүче әдипләр секциясен оештыру инициативасы белән чыккан иде. Быел анда рус, татар, казах, кыргыз, украин, чех һәм словак үзәкләре керде. Алар халыкара конгресслар аралыгында эшне конференцияләрдә алып барырга ниятли. Шундый беренче секцияне Мәскәүдә уздырырга уйлыйлар. Секция турында мәгълүмат, аның бурычлары һәм максатлары турында конгрессның пленар утырышында Андрей Битов чыгыш ясады.

Чех коллегалары чакыруы буенча, Татарстан делегациясе Прагада да булды.

autoscroll_news_right_240_400_1
autoscroll_news_right_240_400_2
news_bot_970_100