Җәмгыять 20 июнь 2018 18:20

Татарстан депутатлары Россия мәктәпләрендә психологик ярдәмне көчәйтүне сорадылар

Татьяна Ларионова республика мәктәпләрендә кадрлар җитмәвен һәм квалификацияләре тиешле дәрәҗәдә булмавын белдерде.

Скопировать ссылку

(Казан, 20 июнь, “Татар-информ”, Валерия Белова). Россиянең һәр мәктәбендә профессиональ психологлар булырга тиеш. Бу хакта “Татар-информ” агентлыгына Татарстан Дәүләт Советы Рәисе урынбасары, “Мәрхәмәт – Милосердие” хатын-кыз депутатлар берләшмәсе җитәкчесе Татьяна Ларионова хәбәр итте.

Аның сүзләренчә, бүгенгә Татарстанның барлык 1403 мәктәбендә 403 мең бала укый. Россия Мәгариф һәм фән министрлыгы нормативы буенча 500 укучыга бер психолог туры килергә тиеш. Депутат мәгълүматлары буенча республика мәктәпләрендә 496 педагог-психолог эшли, бу нормадан ике тапкыр диярлек ким.

“Хәзер Россия Мәгариф һәм фән министрлыгы 300 укучыга 1 психолог туры килергә тиешлеге турында норматив документ әзерли”, - диде “Мәрхәмәт – Милосердие” хатын-кыз депутатлар берләшмәсе җитәкчесе.

Бүген проблемалы мәсьәлә буенча КДМУ пленар утырышында фикер алыштылар, шулай ук РФ Дәүләт Думасы, ТР Дәүләт Советы депутатлары, ТР Министрлар Кабинеты вәкилләре, табиблар, профессорлар, Россия белән Татарстанның төрле ведомстволары вәкилләре балалар сәламәтлеге проблемалары хакында да сөйләштеләр.

“Психологлар кирәк. Әмма психологлар мәктәптә эшли һәм мәктәп директорына бәйле була алмый. Ул социаль даирәдән булырга тиеш. Алар мәктәпкә килеп, мәктәпге вазгыятьне карарга тиеш. Шул вакытта психолог эше нәтиҗәле булачак”, - дип үз фикерен белдерде Татарстан Премьер-министрының җәмгыять берләшмәләре буенча киңәшчесе Андрей Кондратьев.

#депутатлар #психолог

Сәхифәләр

Татарстан депутатлары Россия мәктәпләрендә психологик ярдәмне көчәйтүне сорадылар