Сәясәт 14 сентябрь 2014 21:05

Татарстан Дәүләт Советына сайлауларда тавыш бирү тәмамланды

Беренче нәтиҗәләр иртән билгеле булачак

Скопировать ссылку

(Казан, 14 сентябрь, "Татар-информ", Камил Әсәдуллин). Бүген 20.00 сәгатьтә V чакырылыш Дәүләт Советына сайлауларда тавыш бирү тәмамланды. Республикада барлыгы 65 территориаль сайлау комиссиясе һәм 2763 участок сайлау комиссиясе, шулай ук вакытлыча булу урыннарында 51 участок сайлау комиссиясе эшләде.

Сайлау участоклары ябылганнан соң участок сайлау комиссиясе әгъзалары кулланылмаган бюллетеньнарны юкка чагарырга, тавышлар санын санарга, беркетмәләр тутырырга һәм законда каралган башка процедураларны башкарырга керешә.

ТР Үзәк сайлау комиссиясендә белдерүләренчә, тавышларны санау вакытында көтелмәгән мизгелләр булырга мөмкин. Мисал өчен, закон буенча бер участокта ике кандидат бер үк санда тавыш җыйса, алданрак теркәлгән кандидат җиңәчәк.

Тавыш бирергә килүчеләр саны 1-2 сәгатьтән билгеле булачак, ә сайлауларның беренче нәтиҗәләре 15 сентябрендә ачыкланачак.

Искәртеп узабыз:18.00 сәгатькә булган мәгълүматларга караганда, Татарстанда сайлаучыларның 67,58 проценты яки 1 млн 952 мең 14 сайлаучы тавыш биргән. Тавыш бирүчеләр саны буенча Кайбыч, Чирмешән һәм Әтнә районнары лидерлык итә, анда сайлаучыларның 97 проценттан артыгы тавыш биргән.

(Фотосурәт izbirkom.tatarstan.ru сайтыннан алынды).

Сәхифәләр

Татарстан Дәүләт Советына сайлауларда тавыш бирү тәмамланды