Татарстан чаңгычысы дөньякүләм ярышта Россия җыелмасына җиңү китерде
Дөнья беренчелегендә Зәй чаңгычысы инде икенче медален яулый.
(Казан, 6 февраль, "Татар-информ", Фәрит Салихов). Америкада узучы үсмерләр һәм 23 яшькә кадәрге яшьләр арасында дөнья беренчелегендә Россия егетләре 4х5 чакрым арага эстафета ярышында икенче урын яулады. Составта Зәй егете – Егор Казаринов та бар иде.
Россия чаңгычылары – Егор Казаринов (Татарстан), Кирилл Киливнюк (Красноярск), Ярослав Рыбочкин (Мәскәү) һәм Владислав Вечканов (Чиләбе) финишка Новегия җыелмасыннан 0,4 секундка гына калышып килде. Өченче урында – Франция чаңгычылары (+1.05,4).
Эстафетаның беренче этабында узышкан Татарстан чаңгычысы Егор Казаринов әлеге беренчелектә 10 чакрым арага ирекле ысул белән узышуда көмеш медаль яулаган иде инде.
Сүз уңаеннан, Америкада узучы беренчелектә Россиянең хатын-кыз чаңгычылары (Полина Некрасова, Лидия Дуркина, Анна Жеребятьева һәм Мария Истомина) 4х3,3 чакрым арага эстафетада беренче урын яулады. Италия – икенче, АКШ кызлары – өченче урында.
