Татарстан чаңгычылары Россия ярышларында җиңү яулады
Җәйге чемпионат Төмән шәһәрендә узды.
Скопировать ссылку
(Казан, 11 сентябрь, “Татар-информ”, Фәрит Салихов). Төмәннең “Жемчужина Сибири” кышкы спорт төрләре базасында чаңгычылар арасында җәйге Россия чемпионаты төгәлләнде. Өч көн дәвам иткән ярышларда илнең 225 чаңгычысы, шул исәптән Татарстаннан да 25 чаңгычы көч сынашты.
Ярышларның икенче көнендә 15 һәм 20 чакрым арага ирекле ысул белән шәхси узышларда хатын-кызлар арасында Татарстан чаңгычыларына тиңнәр булмады: яңа сезонда республика данын яклый башлаган Юлия Чекалева – беренче, Анна Нечаевская икенче урын яулады.
Ир-атлар арасында Төмән өлкәсе чаңгычысы Александр Большуновтан 2,9 секундка гына калышып, Яшел Үзән спортчысы Андрей Ларьков финишка икенче булып килде.
Ярышларның соңгы көнендә, старт беркетмәсе беренче ике ярыш нәтиҗәләреннән чыгып уздырылган кросста, Андрей Ларьков белән Анна Нечаевская көмеш медаль яулады.
