Фән һәм мәгариф 18 июль 2026 08:00

Татарстан белем бирү кластерлары булдыру буенча Россия төбәкләре арасында – алдынгы

Скопировать ссылку

2026 ел башына «Яшьләр һәм балалар» илкүләм проектының «Профессионалитет» федераль проектында Россиянең 79 төбәге катнашкан. Бу 300дән артык белем бирү-җитештерү кластерлары. Хәзерге вакытта Татарстанда 22 кластер булдырылган. Бу турыда республиканың Мәгариф һәм фән министрлыгы матбугат хезмәтендә хәбәр иттеләр.

«Профессионалитет» программасы студентларга заводлардагы кебек үк реаль җиһазларда укырга ирек бирә. Бу чыгарылыш укучыларына озак стажировкасыз гына шундук профессионаллар белән бергә эшләү һәм беренче көннән үк республика икътисадына файда китерү мөмкинлеге ача», – дип сөйләде Татарстанның мәгариф һәм фән министры Илсур Һадиуллин.

Проектны финанслауның гомуми күләме 2,9 млрд сумнан күбрәк. Акчаның төп өлешен (1,9 млрд сум) федераль бюджет бүлеп биргән, Татарстан бюджеты 547,8 млн сум керткән, ә эш бирүчеләр проектка 491,05 млн сум белән ярдәм иткән.

Кадрларны әзерләү 9 төп тармак буенча алып барыла. Мәсәлән, машина төзелеше, авыл хуҗалыгы, металлургия, химия сәнәгате, ягулык-энергетика комплексы, туризм, сәнгать, төзелеш һәм электротехник сәнәгать.

Татарстанның лидер булуы төбәкнең алдынгы сәнәгать базасы белән аңлатыла. Зур предприятиеләр – «КАМАЗ», «Татнефть», «Агросила», «Алабуга» һәм башкалар – кластерның актив партнерлары һәм уку мәйданчыкларын җиһазландыру өчен үз акчаларын бүлеп бирә.

«Профессионалитет» кластерларын үстерү Татарстанда 2022 елда Алабуга политехник колледжыннан (АО «ОЭЗ ППТ «Алабуга» белән партнерлыкта) «Машина төзелеше» юнәлеше буенча башланды. 2027 елга төбәктә яңа 4 белем бирү-җитештерү кластеры эшләтеп җибәрү планлаштырыла. Кластерлар өчен Лениногорск политехника көллияте, Яшел Үзән суднолар төзү техникумы, Яшел Үзән механика көллияте һәм Казан төзелеш көллияте нигез булып торачак.

Сәхифәләр

Татарстан белем бирү кластерлары булдыру буенча Россия төбәкләре арасында – алдынгы