Архив 9 март 2009 17:03

Татарстан башкаласы язгы ташуга әзерләнә

Cаклагыч дамбалар канәгатьләнерлек хәлдә, су басуга каршы чаралар күрелгән, дип ышандыра шәһәрнең гражданлык саклау идарәсе җитәкчесе

Скопировать ссылку

(Казан, 9 февраль, “Татар-информ”, Сергей Семеркин). Казанда быелгы язгы ташуга әзерлек барышы буенча бүген мэриядәге аппарат киңәшмәсендә үткәрелгән киңәшмәдә шәһәрнең гражданлык саклау идарәсе җитәкчесе Фердинанд Тимерханов хисап тотты.

Бу кышта явым-төшем әллә ни күп булмавын һәм салкыннарда туфракның 40 сантиметрдан 1 метрга кадәр туңуын искәртеп, идарә башлыгы елгаларда бозның калынлыгы 50 см чамасына җитүен, ә сай елгалар төбенә кадәр туңуын белдерде. Бу хәл исә язын су басуга китерергә мөмкин. “Язгы ташу вакытында Казансу елгасында “бөке”ләр барлыкка килергә мөмкин. Аеруча Подлужная, Малые Клыки, Вознесение урамнары, Сосновка бистәсе күзәтү зоналары булып торачак”, - дип билгеләп үтте ул. Аның сүзләренчә, республика башкаласында Авиатөзелеш районының Муромская, Успенская, Копылов урамнарын, Вахитов районының Подлужная, Подаметьевская урамнарын, Киров районының Серов, Батыршин, Пилотская урамнарын, Яңа Савин районының Савиново, Дружба бистәләрен, Идел буе районнарының өлешчә Борисково һәм Мирный, Первомайский бистәләрен, Совет районының Карьер, Царицино, Әки, Сосновка, Малые Клыки, Кече Дәрвишләр бистәләрен су басу куркынычы бар. Хәзергә саклагыч дамбалар канәгатьләнерлек хәлдә, су басуга каршы чаралар күрелгән, дип ышандыра Ф.Тимерханов.

Казан шәһәре мэры Илсур Метшин киңәшмәдә басым ясап әйткәнчә, су басуга каршы тиешле чараларны актив рәвештә дәвам иттерү зарур, аеруча күпер рәвешендәге кичүләрдә башкарасы эшләр күп.

Сәхифәләр

Татарстан башкаласы язгы ташуга әзерләнә