Татарстан 27 миллион долларга хәләл продукция экспортлаган
Бу елның ун аенда Татарстан 376 миллион АКШ долларына агросәнәгать комплексы продукциясен, шул исәптән 27 миллион доллардан күбрәккә «хәләл» продукция экспортлаган. Бу хакта Татарстан Республикасы Авыл хуҗалыгы һәм азык-төлек министрлыгы матбугат хезмәте хәбәр итте.
«Татарстанның авыл хуҗалыгы продукциясен, шул исәптән «хәләл» стандартлары буенча җитештерелгән продукция экспортлау мөмкинлеге бар. Бу – ит, сөт һәм кондитер продукциясе, көнбагыш мае, бөртекле культуралар, терлек азыгы», – дип билгеләп үтте Татарстан Республикасы авыл хуҗалыгы һәм азык-төлек министры урынбасары Рөстәм Гайнуллов.
Республикада агросәнәгать продукциясен экспортлау белән 258 предприятие шөгыльләнә. Товарлар 56 илгә җибәрелә.
Гайнуллов Татарстан делегациясе составында Төркиядә булды. Ул бу республиканың зур оешмалары вәкилләре белән эшлекле очрашуларда катнашты, 10нчы «World Halal Summit» халыкара сәүдә күргәзмәсе экспозициясен карады.
Башка дәүләтләр белән партнерлыкны үстерү «Халыкара кооперация һәм экспорт» илкүләм проекты максатларына туры килә.