«Татаркино» Бондарчук, Бекмамбетов, Учитель катнашында мастер-класслар оештыра
Мастер-классларда проект өчен инвесторлар эзләргә һәм субсидия алганда документларны дөрес итеп рәсмиләштерергә өйрәтәчәкләр.
(Казан, 23 июль, «Татар-информ», Марат Ишкильдин). «Татаркино» Федор Бондарчук, Тимур Бекмамбетов һәм Алексей Учитель кебек режиссерларны чакырып, теләгән һәркем өчен мастер-класслар оештырырга ниятли. Семинар кысаларында проект өчен инвесторлар эзләргә һәм субсидия алганда документларны дөрес итеп рәсмиләштерергә өйрәтәчәкләр. Бу хакта «Татар-информ» агентлыгына «Татаркино» директоры Миләүшә Айтуганова хәбәр итте.
«Киләсе елда без танылган кинематографистлар катнашындагы мастер-класслар, вебинарларга басым ясарга телибез. Тимур Бекмамбетовны чакырырга ниятлибез. Федор Бондарчук та каршы килмәячәк, шулай ук Алексей Учитель белән дуслыгыбыз да бар», - диде Миләүшә Айтуганова.
Мастер-класс кысаларында субсидия алу өчен дөрес итеп документлар рәсмиләштерү, порталлар аша иганәчеләр һәм инвесторлар эзләү кебек мәсьәләләрне колачлау күздә тотыла.
«Әгәр без вебинарлар һәм мастер-класслар аркылы яңа белемнәр биреп һәм танылган кинематографистларны чакырып карасак, ул чагында алга китеш һичшиксез булачак. Ул теләгән һәркем ачык чара булыр дип көтелә», - диде «Татаркино» директоры.
«Бердәнбер сорау – бу күпме торачак. Әгәр без Бондарчук килә дип әйтәбез икән, аның мастер-классына акча түләп тә киләчәкләренә ышанам», - диде спикер.
Бүгенге көндә «Мир» кинотеатрында «Татаркино»ның киноклубы һәм танылган кешеләрне чакыру, картиналар күрсәтү һәм алар хакында фикер алышу өчен бөтен мөмкинлекләр дә бар.