«Tatarica 2.0» онлайн-энциклопедиясеннән файдаланучылар саны 1,6 миллионнан арткан
Татарстан Фәннәр академиясенең «Tatarica 2.0» ике телле онлайн-энциклопедиясе популярлык казана. Бу хакта ТР Фәннәр академиясенең вице-президенты, филология фәннәре докторы Айнур Тимерханов журналистлар өчен оештырылган семинарда хәбәр итте.
«Бүген ике телдәге «Tatarica 2.0» онлайн-энциклопедия проекты гамәлгә ашырыла. Ул мультимедиа материаллары белән баетылган, татар һәм рус телләрендәге 28 меңнән артык мәкаләне үз эченә ала. Бүгенге көндә көн саен бу ресурстан 4 меңгә якын кеше файдалана. Еллар дәвамында исә кулланучылар саны 1,6 миллионнан артып китте», - диде ул.
Вице-президент билгеләп үткәнчә, әлеге ресурс Татарстан, татар халкы һәм республикада яшәүче башка халыклар турында фәнни яктан тикшерелгән, системага салынган, ышанычлы белем чыганагы булып тора.