Сарытаудагы татар яшьләре милләтара мөнәсәбәтләр буенча фикер алышкан

(Казан, 31 гыйнвар, “Татар-информ”, Ландыш Харрасова). Бу көннәрдә “Сарытау” татар яшьләре оешмасында “Яшьләр мохитендә милләтара мөнәсәбәтләр” дигән темага “түгәрәк өстәл” узган. “Сарытау” газетасы баш мөхәррире Рөстәм Әбүбәкеров “Татар-информ” хәбәрчесенә белдерүенчә, “түгәрәк өстәл”не өлкәнең мәгариф министрлыгының яшьләр сәясәте бүлеге белән “Сарытау” татар оешмасы оештырган.

Утырышка яшьләр милли җәмгыятьләре вәкилләре, Сарытау шәһәренең балалар һәм яшьләр иҗтимагый берлек җитәкчеләре чакырылган булган. Анда “Толерантлык нәрсә ул?”, “Башка мәдәниятне ничек аңларга?”, “Бүгенге Россиядә скинхедлар” дигән мәсьәләләр каралган. Җыелыштагы фикерләр гомумиләштерелгәч, нәтиҗәләре Идел буе халыклары конференциясендә тәкъдим ителәчәк.

Рөстәм Әбүбәкеров белдерүенчә, “Сарытау” татар яшьләре оешмасы киләчәктә дә шундый чаралар уздыруны күздә тота.