Свердловск өлкәсендә мәдәният үзәге ачылды

Татарстан үзәккә видеоконференция, вебинар, онлайн дәресләр үткәрү өчен җиһаз бүләк итәчәк.

(Казан, 30 март, «Татар-информ»). Шушы көннәрдә Свердловск өлкәсендә татар мәдәни үзәге ачылды. Үзәктә татар иҗат коллективлары дәресләрен үткәрү, татар якшәмбе мәктәбе эше, Казан шәһәре белән вебинарлар һәм семинарлар уздыру планлаштырыла.

Анда Татарстанның Свердловск өлкәсендәге Даими вәкиле Хәйдәр Гыйльфанов, Екатеринбург шәһәренең Тимер юл районы администрациясе башлыгы вазифасын башкаручы Лилия Белоблоцкая, Татарстанның беренче даими вәкиле Равил Бикбов, татар иҗтимагый оешмалары җитәкчеләре катнашты. Бу турыда Татарстанның Свердловск өлкәсендәге Даими вәкиллеге матбугат хезмәте хәбәр итә.

Татарстанның Свердловск өлкәсендәге Даими вәкиле Хәйдәр Гыйльфанов сәламләү сүзе белән чыгыш ясады.

Ул Свердловск өлкәсе татарларының Милли-мәдәни автономиясенә Свердловск өлкәсе территориясендә татар мәдәниятен саклауга һәм үстерүгә өлеш керткән өчен Вәкиллекнең Рәхмәт хатын һәм китапханә өчен китаплар комплектын, татар теле дәреслекләрен, шул исәптән татарлар тарихы буенча эксклюзив басмаларны тапшырды.

Татарстан Республикасы үзәккә видеоконференция, вебинар, онлайн дәресләр үткәрү өчен җиһаз бүләк итәчәк.