Әстерхан шәһәрендәге мәктәп янында Габдулла Тукайга бюст ачылды

Татарстан Премьер-министры урынбасары, Милли Шура рәисе Васил Шәйхразиев тантанада катнашкан.

(Казан, 25 февраль, «Татар-информ»). Әстерхан шәһәрендә Тукай исемендәге 74 нче номерлы мәктәп янында Габдулла Тукайга бюст ачылды.

Бөтендөнья татар конгрессы хәбәр иткәнчә, Татарстан Премьер-министры урынбасары, Милли Шура рәисе Васил Шәйхразиев Әстерхан өлкәсенә сәфәре барышында шушы мәктәпкә дә килде.

«Анда ул укытучылар һәм укучылар белән аралаша, мәктәп тормышы белән таныша. Казаннан кунаклар килгән көн икеләтә бәйрәм булды. Мәктәп ишегалдында Габдулла Тукайга бюст ачылды. Милли Шура рәисе әлеге тантанада катнашты», диелә бу хәбәрдә.

Васил Шәйхразиев Тукай исемендәге скверда 2013 елның май аенда ачылган һәйкәлгә дә чәчәкләр салган.