Арчада "Тукай юлы" проекты гамәлгә ашырыла башлый

19 чакрымлы маршрут Түбән Мәтәскә, Югары Мәтәскә, Мөндеш, Иске Кырлай, Иске Иябаш, Яңа Иябаш авыллары аша үтәчәк.
(Казан, 24 июнь, "Татар-информ"). 29 июнь көнне Арчада "Тукай юлы" проекты старт ала. Бу хакта социаль челтәрдәге сәхифәсендә ТР Дәүләт Советы Рәисе урынбасары Римма Ратникова хәбәр итә. 
 
Әлеге халык проектында катнашырга теләүчеләр шимбә көнне 7.53 яисә 8.15 электричка белән Арчага килә ала. Проект Арча тимеръюл мәйданчыгында тантаналы төстә ачылачак. Шуннан соң катнашучылар автобуслар белән Түбән Мәтәскәгә юл алачак. Аннан исә маршрутны җәяүләп яисә велосипедларда үтәргә туры киләчәк. 
 
Соңгы тукталыш Габдулла Тукайның Яңа Кырлайдагы музеенда булачак. 
 
19 чакрымлы маршрут Түбән Мәтәскә, Югары Мәтәскә, Мөндеш, Иске Кырлай, Иске Иябаш, Яңа Иябаш авыллары аша үтәчәк. Чарада катнашучылар татар авыллары тормышы белән таныша, татар милли ризыкларыннан авыз итә һәм татарча җырлар җырлый, тыңлый алачак.