Бүген Омскида Татар мәдәнияте көннәре башланды

(Казан, 23 март, "Татар-информ"). Бүген Омск каласында Татар мәдәнияте көннәре башланды. Ул 3 көн дәвам итеп, 25 мартта тәмамланачак, дип язалар Омск татарларының социаль челтәрдәге төркемендә. 

 

Татар мәдәнияте көннәре кысаларында бүген Конгресс-Холлда (Экспоүзәк) яшьләр һәм Мәдәни үзәк җитәкчеләре өчен түгәрәк өстәлләр, очрашулар, фикер алышулар булачак. Милли ашлар һәм традицион милли һөнәрчелек күргәзмә-ярминкәсе оештырыла.

 

Сүз уңаеннан, бүген чарада катнашучылар дин әһелләре белән очрашып, кызыксындырган сорауларына җавап таба алачак. 

 

Иртәгә, ягъни 24 мартта, бәйгеләр узар дип планлаштырыла. Конгресс-Холлда милли уеннар, “Татар кызы” һәм “Татар егете”, “Аулак өй”, шигырь укучылар бәйгесе узачак. 

 

25 март – йомгаклау көнендә - М.Малунцев исемендәге мәдәният йортында “Чәкчәк PARTY”, "Казан егетләре" төркеме катнашында Гала-концерт, катнашучыларны бүләкләү булачак.

 

Проект РФ Президенты фонды гражданлык җәмгыятен үстерү өчен биргән грантны файдалану хисабына гамәлгә ашырыла.