Түбән Новгород өлкәсе китапханәләре 700 татар китабына баеган

Басмаларны татарлар күпләп яши торган районнарга бүлеп биргәннәр.
(Казан, 20 май, "Татар-информ"). Бөтендөнья Татар конгрессы Түбән Новгородта яшәүче милләттәшләребезгә 700 данә китап бүләк иткән. Бу хакта Түбән Новгород Татар милли-мәдәни автономиясе хәбәр итә. 
 
Татар телендәге матур әдәбият, тарихи китапларны татарлар күпләп яши торган районнарга бүлеп биргәннәр. 
 
Сергач, Спас, Пилнә районнарындагы китапханәләр инде яңа басмалар белән баетылган. Шулай ук Кызыл октябрь район җирле хакимияте дә үз өлешенә тигән китапларны кабул итеп алган. Уразавыл, Чүмбәли авыллары китапханәләренә дә китаплар тапшырылган. 
 
"Татарстан Республикасына һәм Бөтендөнья Татар конгрессына илебез территориясендә татар телен үстерү һәм саклауда ярдәм итүләре өчен рәхмәтебезне белдерәбез", - диелә хәбәрдә.