Сәхифәләр
«Татар-информ» мәгълүмат агентлыгы баш редакторы
Ринат Билалов
420066, Татарстан Республикасы, Казан, Декабристлар ур., 2нче йорт.
«ТАТМЕДИА» акционерлык җәмгыяте
«Татар-информ» мәгълүмат агентлыгы татар редакциясе
Баш редактор
Рәмис Латыйпов
Баш редактор урынбасары
Ләйсән Хафизова
Ульяновск шәһәрендә Гөлчәчәк Сөләйманова истәлегенә мемориаль такта куйдылар
Гөлчәчәк Габделхак кызы Сөләйманова бөтен гомерен социаль өлкәдә эшләүгә багышлый.
(казан, 18 июнь, «Татар-информ»). Ульяновск шәһәренең Засвияжье районы халыкны социаль яклау бүлеге бинасына танылган милләттәшебез Гөлчәчәк Сөләйманова истәлегенә мемориаль такта урнаштырылды.
Гөлчәчәк Габделхак кызы Сөләйманова бөтен гомерен социаль өлкәдә эшләүгә багышлый. Ул 28 елдан артык Засвияжье районының халыкны социаль яклау тармагында хезмәт итә. Милләт җанлы җитәкче узган елның 12 июнендә фани дөньядан бакыйлыкка күчте.
Гөлчәчәк Сөләйманованың бөтен хезмәт юлы аерым игътибар бирүне сораган гражданнар — өлкән буын вәкилләре, сәламәтлек ягыннан мөмкинлекләре чикләнгән кешеләр, балигъ булмаган балалы гаиләләр, шул исәптән күп балалы гаиләләр белән бәйле була.
Ул ветераннарның проблемалы мәсьәләләрен хәл итү буенча Засвияжье районының сәнәгать предприятиеләре — автозавод һәм механика заводы җитәкчеләре белән зур эш алып бара.
Соңгы елларда аның инициативасы буенча «Когда по ночам снится хлеб», «Детство опаленное войной», «Ах милый, если б не было войны» дигән брошюралар басылып чыга. Анда блокадалы Ленинградта яшәүчеләрнең, солдат тол хатыннарының, фашист концлагерьлары тоткыннарының истәлекләре урын алган. Ул сугыш ветераннарының тол хатыннары белән шәхсән таныш була, аларның өйләренә барып хәлләрен белә.
Тынгысыз йөрәкле Гөлчәчәк Сөләйманова җәмәгать эшләре белән дә бик теләп шөгыльләнә. Хатын-кызларның мәнфәгатьләрен яклау, аларның иҗтимагый-сәяси, экономик һәм мәдәни тормышта ролен арттыру максатында районның хатын-кызлар советы составында актив эш алып бара.
Шулай ук районның татар милли-мәдәни автономиясе эшчәнлеген киңрәк җәелдерүгә, дәрәҗәсен күтәрүгә дә бәһасез өлеш кертә. Ул бер генә милли-мәдәни һәм дини чарадан да читтә калмый. Аның игелекле эш-гамәлләре хезмәттәшләре һәм өлкәбез халкы күңелендә озак еллар сакланачак.
Кызыклы яңалыкларны күзәтеп бару өчен Телеграм-каналга язылыгыз