Казакъстанда Муса Җәлилгә һәйкәл ачыла

Шул ук көнне Сабан туе да уздырылачак

 (Казан, 18 июнь, “Татар-информ”). 20 июнь көнне сәгать 10.30 да Казакъстанның Усть-Кеменгорск өлкә архитектура-этнография һәм табигый-ланшафт музей-тыюлыгында Муса Җәлилгә һәйкәл ачу тантанасы була. Ул Бөек Җиңүнең 70 еллыгына һәм Казакъстан халыклары сссамблеясының 20 еллыгына багышлана. Батыр шагыйрьгә монумент ачу идеясе белән татар этно-мәдәни берләшмәсе вәкилләре чыга. Бюстны ТРның атказанган сынчысы Мәхмүт Гасыймов ясаган.

Һәйкәл ачу тантанасыннан соң, Сулъяк яр паркында Сабан туе уздырылачак. Анда мәдәният манистры Айрат Сибагатуллин җитәкчелегендәге Татарстан делегациянең дә катнашуы көтелә, диелә ТР Мәдәният министрлыгы матбугат хезмәте хәбәрендә.