Татар халкының үсеш стратегиясе проектын тәкъдим итү вакыты кичектерелә

Әлеге документның киң җәмәгатьчелеккә кайчан тәкъдим ителәчәге өстәмә рәвештә хәбәр ителәчәк.

(Казан, 11 июнь, «Татар-информ»). Татар халкының үсеш стратегиясен әзерләүче эшче төркем, милли җәмәгатьчелегеннән килгән тәкъдимнәрнең күп булуын истә тотып, Стратегия документының проектын халыкка тәкъдим итү вакытын кичектерүне сорап Бөтендөнья татар конгрессына мөрәҗәгать итте. Бу хакта Бөтендөнья татар конгрессы матбугат хезмәте хәбәр итә.

Фикерләр төрлелеге, тәкъдимнәрнең күп булуы халкыбызның милләт стратегиясенә карата битараф булмавын күрсәтә, диелгән хәбәрдә.

Эшче төркемнең үтенечен исәпкә алып, Бөтендөнья татар конгрессы Татар халкының үсеш стратегиясе проектын әзерләү вакытын озайта. Әлеге документның киң җәмәгатьчелеккә кайчан тәкъдим ителәчәге өстәмә рәвештә хәбәр ителәчәк.