Самарада милли туй үткәрү үзенчәлекләре турында сөйләшәчәкләр

Анда туйны зәвыклы һәм заманча, милли традицияләр белән оештыру турында сөйләячәкләр.

(Казан, 4 август, «Татар-информ»). 5 августта Самара өлкәсенең П. В. Алабин исемендәге тарих-туган якны өйрәнү музеенда «Татарларда кунакта» күргәзмәсе кысаларында милли туй тантанасына багышланган очрашу көтә.

Традицион татар чаралары буенча белгеч Әлфия Сөләйманова туй тантанасын ничек итеп зәвыклы һәм заманча итеп оештыру, анда милли традицияләрне ничек саклап калу һәм туй белгечләрен дөрес сайлау турында сөйләячәк. Бу турыда «Самара татарлары» сайтында хәбәр ителә.

Очрашу кысаларында яулык бәйләү буенча мастер-класс узачак.