Хабаровск халкы Сабан туен бәйрәм итәчәк көн билгеле булды

Татар халкының милли бәйрәмен монда руслар да, украиннар да - барысы бергә бәйрәм итә.

(Казан, 4 май, “Татар-информ”, Лилия Локманова). Быел Хабаровск каласында Сабан туен 9 июльдә билгеләп үтәчәкләр. Бу хакта “Татар-информ” мәгълүмат агентлыгына “Сабан туе гүзәле” бәйгесе проекты җитәкчесе Галия Ельская хәбәр итте.

“Сабан туен бөтен милләт кешеләре дә көтеп ала. Безнең өчен ул - күп милләтләрнең үзенчәлеген чагылдырган, күңелле бәйрәм. Анда татарлар гына түгел, Хабаровскида яшәүче бөтен халык катнаша, ярышларны, концерт номерларын тамаша кылырга килә”, - диде Галия Ельская.

Сүз уңаеннан, Хабаровскида 8 ел рәттән “Сабан туе гүзәле” бәйгесе оештырыла. Анда төрле милләттән булган туташлар үзара көч сынаша. Җиңүче исә Сабан туе батырына бүләк тапшыра.