Татар китапларын Азәрбайҗан чигендә татарча аңламаганга күрә үткәрмәгәннәр

Татарстан китап нәшрияты чит илдә үткәрелгән күргәзмәләрдә татар китапларын тәкъдим иткән.

(Казан, 4 март, «Татар-информ», Зилә Мөбәрәкшина). Татарстан китап нәшрияты китапларының өчтән ике өлешен Азәрбайҗан чигендә уздырмаганнар.

«2017 елда Бакуда узган китап күргәзмәсендә катнашкан идек. Кызганыч, таможнядан нәшрият китапларының өчтән ике өлешен үткәрмәделәр. Таможня хезмәткәрләре татарча китапларның мәгънәсен аңларга тырышып караса да, тиз вакыт арасында төшенә алмады. Китапларның өчтән бер өлешен күргәзмәдә тәкъдим итә алдык», — диде Татарстан китап нәшриятының генераль директоры Илдар Сәгъдәтшин.

Бакудагы Россия мәгълүмати-мәдәни үзәге базасы уздырган онлайн очрашуда ул халыкара китап күргәзмә-ярминкәләрендә һәрвакыт катнашырга әзер булуларын белдерде. «Әлегә пандемия гына тоткарлап тора», — диде Илдар Сәгъдәтшин.

Аның сүзләренчә, Татарстан китап нәшрияты Азәрбайҗаннан тыш, соңгы ун елда Ашхабад, Тегеран, Нур-Солтан, Минск, Төркия, Ташкентта узган китап күргәзмәләрендә катнашкан.