Туймазының “Калфаклы сандугач”ы

(Казан, 2 ноябрь, “Татар-информ”). Туймазы 1 нче интернат-мәктәбенең 11 нче сыйныф укучысы Эльвина Галиева Казанда үткән Сара Садыйкова исемендәге “Калфаклы сандугач” татар җыры һәм музыка уен кораллары IХ төбәкара ачык фестиваль-конкурсында өченче дәрәҗә дипломга лаек булды, дип хәбәр итә “Кызыл таң” газетасы матбугат хезмәте.

Җитәкчесе, 1нче интернат-мәктәпнең татар теле һәм әдәбияты укытучысы Зинфира Нурисламова әйтүенчә, Эльвина бәйгедә Башкортстаннан бердәнбер катнашучы булган.

Конкурс шартлары буенча, кыз Сара Садыйкованың бер әсәрен башкарган. Икенче этапта исә көен үзе язган җырны җырлап ишеттергән.
Эльвина Галиева алга таба тормышын сәнгать белән бәйләргә ниятли. Ә әлегә Бердәм дәүләт имтиханын уңышлы тапшыру өчен тырышып укый, диелә хәбәрдә.