Татарча диктантны Актүбә татарлары да язачак

Чара Казахтан Халыклары Ассамблеясында узачак.

(Казан, 1 октябрь, "Татар-информ"). 27 октябрь көнне узачак "Татарча диктант Яз" акциясендә Актүбә татарлары да катнашачак. Бу хакта җирле милләттәшләрнең "Шатлык" оешмасы хәбәр итә.

Чара 15.00 сәгатьтә Казахтан Халыклары Ассамблеясында узачак.

Билгеле булганча, узган ел акциягә Россиянең 20 төбәге - Казан, Мәскәү, Санкт-Петербург, Ижау, Уфа, Төмән, Екатеринбург, Саратов, Новосибирск, Самара, Пермь, Омск, Әстерхан, Иркутск һ.б. кушылган иде. Шулай ук 9 чит илдә яшәүче милләттәшләр татар теле буенча белемнәрен тикшерде. Гомумән алганда, 2017 елда 2 меңләп кеше "Татарча диктант Яз" да катнашты.