Мәскәүдәге "Калфак туе"нда милли баш киемен үзеңә тегәргә мөмкин булачак

Бәйрәмдә башкаланың танылган дизайнерлары стильле татар костюмнарын күрсәтергә планлаштыра.
(Казан, 1 март, "Татар-информ"). 9 март көнне Мәскәүнең Татар мәдәни үзәгендә узачак "Калфак туе" бәйрәмендә тамашачыларны җыр-биюгә, калфак тегәргә өйрәтәчәкләр. Бу хакта җирле татар хатын-кызларының "Ак калфак" оешмасы хәбәр итә. 
 
Чарада катнашачак яшь артистлар исә тамашачылар белән бергә татар халык җырлары һәм заманча популяр композицияләрне башкарачак. Мәскәүнең танылган дизайнерлары чарага стильле татар костюмнары күргәзмәсе әзерли. 
 
Ел саен "ак калфак"лылар оешма тарафыннан үткәрелә торган төрле бәйге җиңүчеләрен әлеге бәйрәмдә бүләкли. Мисал өчен, узган ел "Гаилә җырлый", "Татар кызы", "Киленкәй" конкурслары җиңүчеләре "Калфак туе"ннан призлар белән киткән. 
 
Быел "Ак күңелле әби-бабайлар оныклары белән" конкурсы җиңүчеләре бүләкләнәчәк. Шулай ук татар милли ризыклары пешерүчеләр арасында да бәйге үткәрү планлаштырыла, диелә хәбәрдә.