“Туган тел” татар газетасының чираттагы саны чыкты

“Туган тел” татар газетасының чираттагы саны чыкты

(Бишкәк, 1 февраль, “Татар-информ”, Илдар Сәмигуллин). Кыргызстан татарлары тарафыннан чыгарыла торган “Туган тел” газетасының алтынчы саны дөнья күрде. Газетаның баш мөхәррире Гүзәлия Кәримова һәм хәбәрчесе Мәрьям Гарифуллина укучыларны татар диаспорасы иҗтимагый тормышының күренекле активисты, Бишкәк техник университеты доценты Шәүкәт Фияз улы Ниязовның тормыш юлы һәм иҗтимагый эшчәнлеге белән якыннан таныштыралар.

Газетада шулай ук “Татар теленең формалашу тарихы” исемле мәкалә басылган. Анда туган телнең формалашу дәвере һәм бүгенге торышына анализ ясалган. Бу мәкаләдә укучылар игътибарына татар телендә С.Кудаш, Н.Нәҗми һәм Ф.Гариповаларның татар телен саклауның мөһимлеге турындагы фикерләре китерелгән. Ә “Иркәм” сәхифәсе астында танышырга теләүчеләр өчен игъланнар да бар.

Газетада материаллар, гадәттәгечә, рус һәм татар телләрендә бирелгән.