Татар язучысын Нобель премиясенә тәкъдим итүгә әзерлек бара
Скопировать ссылку
Татар ПЕН-үзәге татар язучысы кандидатурасын Нобель премиясенә әзерли.
«Татар ПЕН-үзәге Әдәбият буенча Нобель премиясе лауреатлыгына конкурска катнашырга рәсми чакыру алды. Кандидатура әзерлибез», - дип мәгълүматны раслады «Татар-информ» хәбәрчесенә язучы, Татар ПЕН-үзәгенең башкарма директоры Әхәт Мушинский.
«Бик хөрмәтле өлкән яшьтәге язучыбызның әсәрләрен инглиз теленә тәрҗемә итә башладык. Әлегә кем икәнлеген әйтергә ярамый», – диде ул.
Әхәт Мушинский
Фото: © Рамил Гали
Андый рәсми чакыруны Татар ПЕН-үзәге алдагы елларда да алган. Хәтта бер елны күренекле язучы һәм җәмәгать эшлеклесе Туфан Миңнуллинның кандидатурасы тәкъдим ителгән дә булган.
- ПЕН-үзәк - PEN International, Бөтендөнья (яки Халыкара) Язучылар Берлеге — төрле әдәби жанрларда иҗат итүче һөнәри язучыларны, шагыйрьләрне, журналистларны берләштерүче халыкара хөкүмәттән гайре оешма. Оешманың идарәсе Лондонда урнашкан.
- Татар милли ПЕН-үзәге 1996 елда Мексикада узган Бөтендөнья язучылар конгрессында халыкара ПЕН-клубка кабул ителә. Беренче Президенты – халык язучысы, күренекле драматург Туфан Миңнуллин. Хәзер Президенты – халык шагыйре, җәмәгать эшлеклесе Разил Вәлиев.