Татар дөньясы 24 декабрь 2004 16:05

Татар яшьләренең чыршы бәйрәме

Скопировать ссылку

(Уфа, 24 декабрь, «Татар-информ», Фәнис Фәтхуллин). Уфада Башкортстан татар яшьләренең «Җидегән» клубы Яңа ел чыршысы бәйрәме оештырды. Елның иң гүзәл бәйрәмнәренең берсе булган шушы тантанага татар яшьләре алдан ук ныклап әзерләнгән иде. Алар кызыклы мәдәни программа төзеде, эчтәлекле сценарий язды һәм татар артистларын чакырды. Җидегәнчеләр хәтта Кыш бабай роленә дә танылган җырчы, Башкортстанның атказанган артисты, «Сәйяр» студиясе җитәкчесе Идрис Кәлимуллинны чакырды.

Чыршы бәйрәме чәй табыны артындагы ихлас сөйләшү, уен-көлке, җыр-биюләр белән аралашып барды. Татар егетләре һәм кызлары, ә аларның күпчелеге Уфадагы югары һәм урта уку йортларында белем алучылар һәм «Азатлык» татар яшьләре берлеге әгъзалары, бу кичке клубка кунакка килүчеләр өчен милли уеннар да оештырды, төрле бәйгеләрдә көч сынашу мөмкинлеген дә булдырды.

Ә инде Кыш бабай – танылган җырчыбыз Идрис Кәлимуллин Чыршы бәйрәмендәге бәйгеләрдә җиңүчеләргә үзенең җырларын гына түгел, ә зур капчыгыннан тәмле-тәмле күчтәнәчләрен һәм истәлекле бүләкләрен дә өләште.

Сәхифәләр

Татар яшьләренең чыршы бәйрәме