Татар Мөшегесе авылында «Муса Җәлил һәм аның көрәштәшләре» дигән тарих сәгате була
25 августта, Җәлилчеләрне искә алу көнендә, Татар Мөшегесе авыл китапханәсендә «Муса Җәлил һәм аның көрәштәшләре» дип исемләнгән тарих сәгате узачак. Очрашу ике истәлекле вакыйгага багышлана: Җәлилчеләрнең батырларча һәлак булуына 82 ел һәм шагыйрьнең тууына 120 ел тулуга. Бу хакта Бөтендөнья татар конгрессы хәбәр итә.
Китапханәче кунакларны Муса Җәлилнең иҗат биографиясе белән таныштырачак. Укучылар аның Оренбург өлкәсе Мостафа авылындагы балачагы, Мәскәү дәүләт университетында укуы һәм Бөек Ватан сугышы башланыр алдыннан Татарстан АССР Язучылар берлегендә җаваплы сәркатип булып эшләве, сугыш башлангач үз теләге белән фронтка китүе, анда армия газетасының корреспонденты булып хезмәт итүе турында беләчәк.
Чара үзәгендә «Моабит дәфтәре» автобиографик шигырьләр циклын иҗат итү тарихы торачак. Чарада катнашучылар яраланган Җәлилнең әсирлеккә эләгүе, «Идел-Урал» легионы төзүе, милләттәшләре арасында антифашистик агитация алып баруы турында ишетәчәк. Бу эшчәнлеге өчен ул гестапо тарафыннан кулга алына һәм Моабит төрмәсенә ябыла. Нәкъ менә шунда, җәзалауны көтеп, шагыйрь үзенең үлемсез әсәрләрен яза.
Шагыйрь юбилеена багышлап, китапханәнең уку залында инде автор әсәрләре җыентыкларыннан китап күргәзмәсе әзерләнгән. Тарих сәгате барышында Муса Җәлил һәм аның көрәштәшләренең якыннарына сугыш кырларында һәм немец зинданнарында язган хатларыннан өзекләр, шулай ук атаклы циклдан шигырьләр яңгыраячак.
1944 елның 25 августында Берлинның Плетцензее төрмәсендә фашистлар кавеме тарафыннан герой-шагыйрь Муса Җәлил һәм аның 10 көрәштәше (Абдулла Алиш, Фоат Сәйфелмөлеков, Гариф Шабаев, Гайнак Кормаш, Сәлим Бухаров, Фуат Булатов, Әхмәт Симаев, Абдулла Баттал, Зиннәт Хәсәнов, Гыймат Шәймәрдәнов) җәзалап үтерелде. Әлеге дата ел саен Җәлилчеләрне искә алу көне буларак билгеләп үтелә.