Мәдәният 29 ноябрь 2017 10:36

“Татар моңы” лауреаты Әдилә Әхмәтова иң популяр хитларны татарчага тәрҗемә итеп җырлый

Әдилә Әхмәтованы “Татар моңы-2017” Халыкара телевизион яшь башкаручылар конкурсының гала-концертын алып баручылар танылган блогер дип тәкъдим иттеләр.

Скопировать ссылку

(Казан, 29 ноябрь, «Татар-информ», Рузилә Мөхәммәтова). Әдилә Әхмәтованы “Татар моңы-2017” IX Халыкара телевизион яшь башкаручылар конкурсының гала-концертын алып баручылар тамашачыга танылган блогер дип тәкъдим иттеләр. “Әдиләнең Инстаграмына 8000 кеше язылган. Мин дә язылдым”, - диде Зөлфәт Зиннуров. “Татар моңы” конкурсының гала-концертында Әдилә Әхмәтова кичә Татарстанның атказанган артисты Лилия Муллагалиева белән бергә, “Казан нуры” оркестрына кушылып, “Янар чәчәк” спектакленнән Фәүзия җырын башкарды.

Әдилә Әхмәтова-Заһидуллина тумышы белән Татарстаннан. Санкт-Петербургта Мусоргский исемендәге музыка колледжының эстрада-джаз бүлеген тәмамлаган. Азрак Татарстан дәүләт җыр һәм бию ансамблендә эшләп алган. Хәзер Санкт-Петербургта яши.

Әдилә ире Айнур Әхмәтов белән бергә популяр хитларны - танылган инглиз һәм рус җырларын татарча җырлап үзенең социаль челтәрләрдәге битләренә элә. Җырларны татар теленә Айнур Әхмәтов тәрҗемә итә. Әдиләнең җырлавын өйдә яздыралар. Әхмәтовларның егермеләп татарчалаштырылган кавер-композициясе бар.

“Грибы” төркеме башкарган “Тает лед” композициясенең Әдилә Әхмәтова татарча җырлаган варианты аеруча популярлашкан – аны 3000нән артык кеше караган. Әхмәтовлар “Битлз”ны да, Майкл Джексонны да татарча яздырганнар.

Социаль челтәрләрдә Әдилә Әхмәтова Аделя.Сингер исеме белән теркәлгән, хәбәрләрен ул татар һәм рус телләрен кушып яза.

#“Татар моңы” #Әдилә Әхмәтова

Сәхифәләр

“Татар моңы” лауреаты Әдилә Әхмәтова иң популяр хитларны татарчага тәрҗемә итеп җырлый