Татар китабы йортында Милли музыка оркестрының релакс-концерты була
8 сентябрьдә Казанның Татар китабы йортында Милли музыка оркестры концерты була. Бу хакта Татар китабы йортының матбугат хезмәте хәбәр итә.
«Ул концерт кына түгел, ә чын терапия булачак. Концертта татар музыкасы турында гадәти лекцияләр урынына, оркестр музыкасын тыңлап ләззәт алырга мөмкин», ди оешытручылар.
Арт-терапевт Айназ Зарипова төрле төрдәге музыканың кеше организмына йогынтысы хакында сөйләячәк.
Концерт программасы бөек татар композиторлары, Татарстандагы яшь композиторларның сирәк яңгырый торган әсәрләреннән, шулай ук Чайковский һәм Римский-Корсаков кебек бөек рус классикларының әсәрләреннән тора. Аларның яртысыннан күбесе беренче тапкыр яңгыраячак.
Мәҗбүри дресс-код:
- 1. Уңайлы кием
- 2. Кечкенә келәм яки җәймә
- 3. Яхшы кәеф.
Оркестрның сәнгать җитәкчесе һәм баш дирижеры – Айдар Ниязов. Концертта Азиза Абдураимова, Александр Котенко, Эльмира Галимова, Рөстәм Мозаффаров, Диана Сәмигуллина, Альберт Миндубаев, Егор Шелемов, Ләйлә Сабирова, Иван Былинцев, Алинә Ибраһимова кебек музыкантлар катнаша.