Татар китабы йортында дүртенче шигъри слэм узачак
16 октябрьдә 19:00 сәгатьтә Татар китабы йортында дүртенче шигъри слэм үткәрелә. Бу хакта Татар китабы йорты телеграм-каналында хәбәр ителә.
Шигъри слэм — шагыйрьләр арасында уза торган иҗади ярыш. Бу — академик булмаган мохиттә туган ирекле, тере шигърият. Слэмда 15 шагыйрь чыгыш ясаячак. Һәр катнашучыга үз шигырьләрен уку өчен 3 минут вакыт биреләчәк. Катнашучыларны залдагы тамашачылар ике критерий буенча бәяли: беренчесе — чыгышның сыйфаты, икенчесе — текстның сыйфаты. Иң күп балл җыйган 4 шагыйрь финалга чыга. Барлык этапларда иң күп балл җыйган шагыйрь җиңүче була.
Шагыйрьләр үзенең 3 иң яхшы шигырен 9 октябрьгә кадәр tatarkitabiyourti@yandex.ru почта адресына «СЛЭМ» тамгасы белән җибәрә ала.
Сайлап алынган катнашучыларның исемлеге социаль челтәрләрдә урнаштырылачак.
Җиңүчегә 10 мең сум акча тапшырылачак. Шулай ук катнашучыларның сайлап алынган шигырьләреннән зин нәшер ителәчәк.
