Мәскәүдә татар кичәләре оештыручы Галиябану ханым: Татар кичәләре –туган якның бер кисәге
Мәскәү татарлары җыелырга ярата торган «Мин – Син» аралашу клубы шушы көннәрдә үзенең 15 яшьлеген билгеләп узды. Аның хуҗабикәсе Галиябану Мәҗитова башкалада татарлар белән аралашу җитми, ди.
«Татарча аралашу, татарлар белән аралашу җитми. Аларның шәһәрдә туып үскәннәренең дә балачагы әби-бабай янында авылда үткән. Ностальгия. Мәсәлән, минем ирем Мәскәү егете булса да, әбисе чыгышы белән Татарстанның Апас районыннан. Ул әбисенең коймак пешергәндә татарча җырлавын искә ала. Татар клубына беренче мәртәбә килгәч тә әбисен исенә төшергән.
Күпләр өчен безнең татар кичәләре – туган якның бер кисәге. Безнең формат – татар туе. Мин беренче килгән кешеләргә шулай дим: «Үзегезне татар туена килгән кебек хис итегез! Монда кияү белән кәләш кенә юк, башкасы туйдагыча», – дим. Кешеләр атна азагында туйдагыча җырлап-биеп ял итәләр дә, дүшәмбе яхшы кәеф белән эш атнасын башлыйлар», – ди ул.
Галиябану Мәҗитова белән «Интертат» сайты өчен Рузилә Мөхәммәтова сөйләште.
