«Татар-информ» агентлык ветераннарын Татарстан Республикасы Матбугат көне белән котлады
19 майда, Татарстан Республикасы Матбугат көнендә, «Татар-информ» хезмәткәрләре мәгълүмат агентлыгының беренче хезмәткәрләрен котлады һәм истәлекле бүләкләр тапшырды. Төрле буын хезмәткәрләр агентлыкның ничек барлыкка килүен искә алды һәм журналист һөнәренең әһәмияте турында сөйләде.
Редакция ветераннары – элеккеге корреспондентлар, редакторлар һәм техник белгечләр хәзерге хезмәткәрләрнең котлауларын елмаеп кабул итте.
«Татар-информ»ның беренче җитәкчесе Гомәр Богдалов 1990нчы еллар чигендә мәгълүмат агентлыгы эшчәнлегенең башлангычында торган. «Журналистлар өчен бәйрәм булдыру – минем идея иде. Соңрак ул Татарстан Республикасы Матбугат көне булды. Без укучыларга дөреслекне сөйләүчеләрнең үз бәйрәме булу турында хыялландык. Бүген мин агентлыкның ничек үскәнен, күпме эш эшләнгәнен күрәм. Бу – безнең уртак җиңүебез», - дип белдерде ул.
Фото: © «Татар-информ», Чулпан Шакирова
«Татар-информ» журналисты Маһирә Миңнуллина агентлык 1990 елларда оешканнан бирле татар редакциясе өчен
язган. «Искә алуыгыз өчен рәхмәт! Безнең өчен «Татар-информ» эш кенә булмады. Бу – тормыш рәвеше иде», - диде ул, хезмәттәшләренә рәхмәт белдереп.
Фото: © «Татар-информ», Чулпан Шакирова
«Татар-информ» хезмәткәрләре шулай ук 2000 еллар башында «Татар-информ» мәгълүмат агентлыгы генераль директоры урынбасары булып эшләгән Дания Тямаева янына да барды.
Элегрәк ТР Дәүләт Советы Рәисе Фәрит Мөхәммәтшин массакүләм мәгълүмат чаралары вәкилләрен, тармак ветераннарын, полиграфия һәм медиасфера хезмәткәрләрен Татарстан Республикасы Матбугат көне белән котлады.
«Безнең гаммәви мәгълүмат чараларыбыз һәрвакыт җитлеккәнлек һәм җаваплылык күрсәтүе, ә төбәк Россия Федерациясендә иң күп укучы төбәкләрнең берсе булуы белән горурланабыз, – дип билгеләп үтте сәясәтче. – Дәүләт ярдәме нәтиҗәсендә милли матбугатны, муниципаль гаммәви мәгълүмат чараларын саклап калып була».