Татар халкының милли үзенчәлеген саклау программасы киләсе атнада тикшереләчәк
Акчаны җилгә сарыф итәргә кирәкми, андый булган очракта акчаны бюджетка кайтаруыбыз хәерлерәк, ди Милли Шура рәисе.
(Казан, 25 август, «Татар-информ», Зилә Мөбәрәкшина). ТР Министрлар кабинетының 2020-2023 елга каралган «Татар халкының милли үзенчәлеген саклау» дәүләт программасын хакында киләсе атнада зур утырыш булачак. Анда программа белән бәйле барлык мәсьәлә хакында сөйләшенәчәк. Бу хакта Милли шура рәисе Васил Шәйхразиев Татарстанда милләтара һәм конфессияара мөнәсәбәтләр мәсьәләләре буенча ведомствоара эш төркеме утырышында сөйләде.
«Әлеге программа 2020 елдан башлана. Инде быелдан ук финанслау билгеләнгән, алда 4 ай кала, бу вакыт эчендә беркем дә еллык бюджетны үтәү өчен ашыктырмаячак. Моның өчен без нәтиҗәле эшли алуыбызны аңларга тиеш. Акчаны җилгә сарыф итәргә кирәкми, андый булган очракта акчаны бюджетка кайтаруыбыз хәерлерәк. 2021 елдан бу программа тулы көченә эшли башлаячак», — диде ул.
Васил Шәйхразиев әлеге программаны бары тик тулыландыру гына матур булмас иде һәм ул барлык таләпләргә дә җавап бирмәс иде дип саный. «Эшче төркем тулысынча яңа программа булдырды. Һәр пункт җентекләп өйрәнелде. Безнең өчен иң мөһиме — бүлеп бирелгән бюджетның нәтиҗәлелеге», — диде ул.
«2018 елда Татарстан Президентының Дәүләт Советына юлламасы вакытында Бөтендөнья татар конгрессына татар халкы үсеше стратегиясен кабул итү бурычы куелды. Татар конгрессы, галимнәрне, архивчыларны, битараф булмаган гражданнарны чакырып, проектны булдыруга кереште. Әзер булгач, аны татар дөньясына тәкъдим итү өчен эскиз дип атау кабул ителде. Ул эскиз белән без бөтен Россияне буйлап йөреп кайттык», — ди рәис.
Шәйхразиев очрашу барышында бик күп тәкъдимнәр кертелгәнен билгеләп үтте. «Тәкъдимнәр шулкадәр күп булды ки, аларның барысын да безнең республика программасына салынган матди өлешкә төшкәнен аңладык. Шул вакытта эшче төркем татарларның бу стратегияне кабул итеп булмавын, аны дәүләт программасына күчерергә кирәклеген уйлады», — дип ачыклык кертте ул.
Яңа программаның төп максаты — Татарстан Республикасында һәм аннан читтә татар халкының милли үзенчәлеген саклап калу һәм ныгыту. Яңартылган программаның бурычы — татарларның тарихи-мәдәни мирасын өйрәнү, саклау һәм популярлаштыру, татар халкының туган телен, мәдәниятен һәм гореф-гадәтләрен саклап калу һәм үстерү, татар мәгълүмат һәм мәдәниятара багланышлар инфраструктурасын булдыру һәм үстерү.