Мәдәният 4 июнь 2018 09:15

"Татар археографиясе" сериясендә яңа китап чыкты

Археограф, текстолог Раиф Мәрдановның "Алдым каләм, яздым сәлам..." дип аталган китабы сериянең чираттагы 21нче басмасы булды.

Скопировать ссылку

(Казан, 4 июнь, "Татар-информ"). Татарстан Республикасы Милли китапханәсе нәшер итә торган "Татар археографиясе" сериясеннән археограф, текстолог Раиф Мәрдановның "Алдым каләм, яздым сәлам..." дип аталган чираттагы 21нче китабы дөнья күрде. Бу турыда Милли китапханәнең матбугат хезмәте хәбәр итте.

Китап "Милли китап" нәшриятында чыккан.

Археографик сериянең әлеге китабында 1822–1934 еллар арасында төрле кешеләр тарафыннан язылган 44 хат тексты туплап бирелгән.

Хатларның авторлары – мөфтиләр, ахуннар, муллалар, хаҗилар, Ш.Мәрҗанинең туганнары һәм шәкертләре һ.б. Хатларда үз чорының төрле мәсьәләре чагылыш тапкан, гыйшык-мәхәббәт хәлләре, кешенең рухи кичерешләре, уй-борчулары, шатлыгы һәм хәсрәте ачыктан-ачык күренеп тора, диелгән әлеге хәбәрдә.

Җыентыкка гомуми кереш мәкалә һәм һәрбер хатка карата искәрмәләр язылган.

Раиф Мәрдановның бу китабы татар халкының язма мирасын өйрәнүчеләргә, шулай ук киң катлау китап укучыларга атап төзелгән.

#яңа китап

Сәхифәләр

"Татар археографиясе" сериясендә яңа китап чыкты