Ташкентта «Ак мәрҗән» курчак театры беренче тапкыр татарча Яңа ел тамашасы күрсәтте
Ташкент шәһәре Татар иҗтимагый мәдәни-агарту үзәге курчак театрының беренче чыгышын тәкъдим итте. Алар татар телендә Яңа ел тамашасы күрсәтте. Бу хакта Ташкент шәһәре Татар иҗтимагый мәдәни-агарту үзәгенең Телеграм-каналында хәбәр ителә.
Чарада Кыш бабай белән Кар кызы чыгыш ясады. Балалар рус һәм татар телләрендә шигырьләр сөйләде, «Болгар» ансамбле рус һәм татар телләрендә җырлады.
«Ак мәрҗән» курчак театры җитәкчесе һәм спектакльнең сценарие авторы Рәйхан Фахаргалиева, «Болгар» балалар ансамбленең җитәкчесе, Татарстанның атказанган мәдәният хезмәткәре Римма Гыйззәтуллина. Кыш бабай Әнвәр Зиннәтуллин, Кар кызы Сәлимә Кәримова булды.
Программаны Татарстанның халык артисты, Башкортстанның атказанган артисты Фирүзә Халдарова әзерләгән. Чараны «ТНВ-Планета» телеканалының Үзбәкстандагы корпункты яктыртты, диелә хәбәрдә.