Тамашачыларым арасында футболны популярлаштырырга тиешмен – Нюша
Танылган җырчы - футбол буенча 2018 елгы Дөнья чемпионаты илчесе - футбол матчларын калдырмаска тырыша.
(Казан, 22 июнь, “Татар-информ”, Фәрит Салихов). Максатым, тамашачыларыма футбол турында күбрәк мәгълүмат бирү, дип белдерде танылган җырчы, футбол буенча 2018 елгы Дөнья чемпионаты илчесе Нюша Конфедерацияләр Кубогына аккредитация узмаган журналистлар өчен уздырылган матбугат конференциясе вакытында.
“Минем максат - үз тамашачыларымны футбол турнирында булган хәлләр белән таныштыру, һәм алар арасында әлеге спорт төрен тагын да популярлаштыру”, – дип белдерде Нюша.
Ул шулай ук бала вакытында туп тибәргә яратуын, ә бүген үзе дә тамаша кылачак Германия-Чили матчында немецлар өчен җан атачагын да белдерде. Танылган җырчы Казан аның яраткан шәһәрләренең берсе булуын җиткерде.