Талпан энцефалитыннан прививка ясатыр вакыт җитте – Марина Патяшина
Роспотребнадзор идарәсе җитәкчесе әйтүенчә, кешеләр прививканы үз хисабына ясата ала.
(Казан, 28 апрель, “Татар-информ”, Гөлнар Гарифуллина). Роспотребнадзор хезмәтенең Татарстан буенча идарәсе җитәкчесе Марина Патяшина әйтүенчә, талпан энцефалитыннан прививка ясатыр вакыт җитте.
Марина Патяшина бүген талпан энцефалитыннан вакцинация куркыныч янаган төркемгә керүчеләргә уздырылганын әйтте. Бу урманнарда эшләүчеләр – урманчылар, геологлар. “Гади кешеләр үз акчасы хисабына прививка ясата ала. Бу Татарстанда киң таралган күренеш дип санамыйм. Талпан энцефалитыннан вакцинаны күбрәк талпаннар күп булган җирлекләргә баручылар кадата. Мәсәлән, былтыр минем ирем һәм улым Уралга тауларга барганнар иде, без аларга прививка ясаттык. Тик аны алдан кайгырту зарур. Мондый урыннарга җәйге сәяхәткә баручылар өчен вакыт җитте инде. Апрель-майда ук ясатырга кирәк, чөнки әле иммунитет булганчы, бер ай кирәк”, - дип Патяшина соңга калмаска киңәш итте.