news_header_top_970_100
news_header_bot_970_100

Тәлгат Таҗетдин: Болгарлар монголларның Россиягә һөҗүмен тоткарлап торган

«Сүбәдәй хан рус кенәзләренең, кыпчак ханнарының берләшкән гаскәрләрен җимергән һәм Киевны тар-мар иткән. Украина кенәзләре ул вакытта анда булмаган», - диде хәзрәт.

Тәлгат Таҗетдин: Болгарлар монголларның Россиягә һөҗүмен тоткарлап торган
Рамил Гали

Россия мөселманнарының Үзәк Диния нәзарәте рәисе, мөфти Тәлгат Таҗетдин фикеренчә, Идел буе Болгар дәүләте халкы унөч ел дәвамында монголларның Россиягә килүен тоткарлап торган.

«Идел буе Болгары - Европада беренче мөселман дәүләте. Болгарлар 1232 елда Сүбәдәй ханның 40 меңлек гаскәрен Самарадан ерак түгел Җигүле тауларында тар-мар итеп, Россия һәм Көнчыгыш Европага һөҗүмен унөч елга тоткарлап тора. Ә украиннар моның белән мактана алмый», - диде «Россия-Ислам дөньясы» стратегик караш төркеме утырышында.

Тәлгат Таҗетдин бу вакыйганың Калка елгасы буендагы бәрелештән соң булган дип саный. «Сүбәдәй хан рус кенәзләренең, кыпчак ханнарының берләшкән гаскәрләрен җимергән һәм Киевны тар-мар иткән. Украина кенәзләре ул вакытта анда булмаган», - диде Үзәк Диния нәзарәте рәисе.

«1235 елда Бату хан Идел буе Болгар дәүләтен яулап алырга килгәч тә, ватаныбызны йотып алганнан соң да, монголларга каршы тору тукталмаган», - диде хәзрәт.

Шуннан соң Тәлгать Таҗетдин Көнбатыш илләрен Украинадагы милләтчеләргә ярдәм күрсәтү өчен тәнкыйтьләде. «Көнбатышның бөек һәм бердәм державага мөнәсәбәте һәр йөз ел саен диярлек кабатлана», - ди ул.

Мөфти утырыштагы катнашучыларны Украинадагы махсус хәрби операциядәге «ватаныбызның ышанычлы сакчыларына» багышлап дога кылырга чакырды. «Туган ил алдындагы изге бурычларын үтәүчеләргә, Луганск һәм Донец халкын нацизмнан яклаучыларга дога кылыйк», — диде Тәлгат Таҗетдин.

news_right_column_1_240_400
news_right_column_2_240_400
news_bot_970_100