Хәвеф-хәтәр 26 гыйнвар 2017 12:03

ТАИФ-НК һәм Казан дары заводларында шартлауларда гаеплеләр җавап тотачак – тикшерү идарәсе

Россия Тикшерү комитетының Татарстан идарәсе башлыгы производстволардагы бәхетсезлек очраклары өчен 30 лап вазифаи зат хөкемгә тартылуын әйтте.

Скопировать ссылку

(Казан, 26 гыйнвар, "Татар-информ", Гөлнар Гарифуллина). "Республиканың кайбер эре предприятиеләрендә куркынычсызлыкны тәэмин итү проблемасы игътибарга лаек", – диде Россия Тикшерү комитетының Татарстан буенча идарәсе җитәкчесе Павел Николаев Түбән Камада "ТАИФ-НК" һәм Казан дары заводларында булган хәлләрне күз уңында тотып. Искәртеп үтик, Түбән Камада шартлау нәтиҗәсендә 5 кеше үлде, 6 кеше зыян күргән иде.

Павел Николаев Казан дары заводында соңгы ике елда производство объектларында 4 тапкыр ут чыкканын билгеләп үтте. Соңгы очракта бер хатын-кызның үлгәнен, тагын ике кешенең җитди зыян күргәнен искәртте. "Бу хәлләрнең икесендә дә нәтиҗәләр тагы да аянычрак була алуы көн кебек ачык. Тикшерү барышында барлык җаваплы вазифаи затларның гамәлләренә катгый бәя биреләчәк. Гаеплеләр җаваплылыктан кача алмаячагына ышандырабыз", – диде ул.

Идарә башлыгы хезмәт сагы кагыйдәләре үтәлмәү аркасында, хезмәткәрләренең үлеменә һәм имгәнүенә китергән очракларда гаепле 30 лап вазифаи зат хөкемгә тартылганын әйтте.

#Татарстан буенча тикшерү идарәсе #Павел Николаев #ТАИФ-НК шартлау

Сәхифәләр

ТАИФ-НК һәм Казан дары заводларында шартлауларда гаеплеләр җавап тотачак – тикшерү идарәсе